विद्युत् चुहावटमा संलग्न बीस पक्राउ

सुरुङ्गा (झापा), चैत १४ गते । झापाको कनकाई नगरपालिकास्थित सुरुङ्गाबाट विद्युत् चुहावटमा संलग्न सात महिलासहित २० जनालाई पक्राउ परेका छन् ।नेपाल विद्युत् प्राधिकरण अनारमनी वितरण केन्द्र र इलाका प्रहरी कार्यालय अनारमनीको संयुक्त गस्ती टोलीले आइतबार राति उनीहरुलाई विद्युत् चोरी गर्दागर्दै विद्युतीय उपकरणसहित पक्राउ गरिएको अनारमनी वितरण केन्द्रका प्रमुख राजीवकुमार सिंहले जानकारी दिनुभयो । सिंहका अनुसार उनीहरुलाई सुरुङ्गाको प्रजापति टोलबाट पक्राउ गरिएको हो । पक्राउ परेका सबैलाई इलाका प्रहरी कार्यालय अनारमनीमा राखिएको बताइएको छ ।उनीहरुका साथबाट टोलीले सिँचाइको मोटर, त्यसमा प्रयोग गरिने विद्युतीय तार बरामद गरेको छ । त्यस्तै हुकिङ गरेर घरमा जडान गरिएको तार, मिटर समेत बरामद गरिएको प्राधिकरणका इञ्जिनियर धीरेन्द्र बजगाईंले जानकारी दिनुभयो ।विद्युत् चुहावट नियन्त्रण ऐनअन्तर्गत उनीहरुमाथि कारबाही अघि बढाइने नेपाल विद्युत् प्राधिकरण अनारमनी वितरण केन्द्रका केन्द्र प्रमुख सिंहले बताउनुभयो ।

काँग्रेस बैठक: २९ सदस्यीय केन्द्रीय कार्य सम्पादन समिति गठन

ललितपुर, चैत १४ गते ।  नेपाली काँग्रेसको आइतबारदेखि सुरु भएको केन्द्रीय समितिको बैठकले पहिलो दिन चार विषयको टुङ्गो लगाएको छ ।  ललितपुरको सानेपास्थित बीपी कोइराला स्मृति भवनमा बसेको बैठकले केन्द्रीय कार्य सम्पादन समिति, केन्द्रीय निर्वाचन परिचालन समिति, निर्वाचन घोषणापत्र तयारी समिति गठन गर्नुका साथै कार्य सम्पादन समितिलाई थप अख्तियारी प्रदान गर्ने निर्णय गरेको हो ।

किसानका लागि जलवायु अनुकूलन कार्यक्रम

काठमाडौँं, चैत १४ गते । जलवायु परिवर्तनको असर विश्वव्यापी रूपमा परिरहेको छ ।  त्यसमा पनि नेपालजस्ता अल्पविकसित मुलुकमा यसको प्रभाव बढी र प्रत्यक्ष रूपमा परिरहेको छ ।  दिन–प्रतिदिन घटबढ भइरहेको तापक्रमले रहनसहन, खानपान, कृषि प्रणालीलगायतका दैनिक जीवनमा असर परिरहेको छ ।  अतिवृष्टि, अनावृष्टि, सुख्खा, बाढी, पहिरोलगायतका प्राकृतिक घटनाले विशेष गरी गरिब, विपन्न तथा प्राकृतिक सम्पदामा आधारित जीवन गुजारा गर्ने समुदायमा नकारात्मक प्रभाव पारिरहेका छन् ।  यही कुरालाई दृष्टिगत गरी वन तथा भूसंरक्षण मन्त्रालयले जलवायु परिवर्तनका असरले अति सङ्कटापन्न देखिएका पश्चिम नेपालका रोल्पा, रुकुम, सल्यान, जाजरकोट, दैलेख र कालिकोट जिल्लाका साना किसानका लागि जलवायु अनुकूलन कार्यक्रम सञ्चालन गरिरहेको छ ।

संविधान संशोधन नभए निर्वाचन हुँदैन : मधेसी मोर्चा

upendra yadav

राजविराज (सप्तरी), चैत १४ गते । सङ्घीय समाजवादी फोरम नेपालका अध्यक्ष उपेन्द्र यादवले संविधान संशोधन नभए कुनै पनि हालतमा निर्वाचन हुन नसक्ने बताउनुभएको छ । सप्तरीमा प्रहरीको हातबाट ज्यान गुमाएका पाँच जना मधेसी मोर्चाका कार्यकर्ताको आइतबार मलेठस्थित राजविराज औद्योगिक क्षेत्रमा आयोजित श्रद्धाञ्जलि सभालाई सम्बोधन गर्दै उहाँले सङ्घीय प्रणालीमा स्थानीय चुनाव गराउने अधिकार काठमाडौँलाई नरहेको बताउनुभयो ।मधेसको स्थानीय चुनाव गराउने अधिकार मधेस सरकारको भएको दाबी गर्दै उहाँले भन्नुभयो – “यदि चुनाव गराउनु छ भने केन्द्रको गराओस् । केन्द्रको चुनाव गराएर स्थानीय तह दुरुस्त बनाएपछि मात्रै स्थानीय तहको चुनाव गराइनुपर्छ ।”तराई मधेस लोकतान्त्रिक पार्टीका (तमलोपा)का अध्यक्ष महन्थ ठाकुरले सीमाङ्कनसहित संविधान संशोधनको प्रस्ताव आए मात्र निर्वाचनमा जाने बताउनुभयो ।यस्तै, सद्भावना पार्टीका अध्यक्ष राजेन्द्र महतोले मुलुकका तीन ठूला दलबाट मधेसप्रति भेदभाव भइआएको बताउनुभयो । राष्ट्रिय मधेस समाजवादी पार्टीका अध्यक्ष शरत्सिंह भण्डारीले २ नम्बर प्रदेशलाई छाडेर निर्वाचन गराए त्यसपछि कुनै पनि सरकारले त्यहाँ निर्वाचन गर्न सक्दैन भन्नुभयो । सोही श्रद्धाञ्जलिसभामा फोरम गणतान्त्रिकका अध्यक्ष राजकिशोर यादव, नेपाल सद्भावना पार्टीका अध्यक्ष अनिल झा र तराई मधेस सद्भावना पार्टीका अध्यक्ष महेन्द्र राय यादवले सीमाङ्कनलाई थाती राखेर वा छाडेर सहमति हुन नसक्ने धारणा राख्नुभएको थियो ।मधेसको अधिकार प्राप्तिका लागि एउटै बलियो पार्टी बनाउनुपर्नेमा मोर्चाका शीर्ष नेताले सम्बोधनका क्रममा जोड दिएका छन् ।दुई साता अगाडि नेकपा (एमाले)को मेची–महाकाली अभियानअन्तर्गत सप्तरीको मलेठस्थित राजविराज औद्योगिक क्षेत्रमा प्रहरीले चलाएको गोली लागेर पाँच जना मधेसी मोर्चाका कार्यकर्ताको मृत्यु भएको थियो भने दुई दर्जन घाइते भएका थिए ।

मतदाता शिक्षा कार्यक्रमको तयारी तीव्र

काठमाडौँ, चैत १३ गते ।  २०७४ वैशाख ३१ गते हुने स्थानीय तह निर्वाचनलाई स्वच्छ, निष्पक्ष, पारदर्शी तथा भयमुक्त वातावरणमा सम्पन्न गर्न र मतदातालाई सुसूचित गराउने उद्देश्यले २१ हजार मतदाता शिक्षा कार्यकर्तालाई घरघरमा पठाउने तयारी निर्वाचन आयोगले गरेको छ ।  सोही प्रयोजनका लागि आयोगले शनिबारदेखि देशका आठ स्थानमा मतदाता शिक्षा कार्यक्रम सञ्चालन गर्न क्षेत्रीय प्रशिक्षक प्रशिक्षण सुरु पनि गरेको छ ।  
दुईदिने प्रशिक्षण कार्यक्रम विराटनगर, सिन्धुली, हेटौँडा, ललितपुर, पोखरा, बुटवल, नेपालगन्ज र धनगढी गरी आठ स्थानमा सञ्चालन भइरहेको छ ।  प्रशिक्षण कार्यक्रममा जिल्ला निर्वाचन अधिकारी, सामुदायिक विद्यालयका सामाजिक शिक्षा अध्यापन गराउने माध्यमिक शिक्षक (महिला), जिल्ला शिक्षा कार्यालयका स्रोत व्यक्ति तथा जिल्ला समन्वय समितिका सामाजिक परिचालक गरी देशभरिका ३५४ जनालाई क्षेत्रीय प्रशिक्षक प्रशिक्षण दिने कार्यक्रम छ ।